
ஹைக்கூ என்னும் திரைப்படத்தின் திரை விமர்சனம் :-
கதைக் கரு :-
காதலை மையமாக வைத்து ஒரு வாலிபனின் கதையே இப் படத்தின் மையக் கரு .
கதையும் கதையின் போக்கும் :-
மனோ கல்லூரியில் படிக்கும் கல்லூரி மாணவன். கல்லூரியில் படிக்கும் போதே சக மாணவியைக் காதலிக்கிறார். இவர்கள் காதல் வளர்பிறை போல நாளும் வளர்கிறது. சிற்சில காரணங்களால் இவர்களின் காதல் முறிகிறது. முதல் காதலின் நினைவுகள் அதனால் ஏற்பட்ட மன வலிகள் இதனையே வாழ்க்கையின் ஓர் அங்கமாக தன் மனத்தில் சுமந்து காலத்தை ஓட்டுகிறார் மனோ.
இவருக்கு மீண்டும் வேறொரு காதல் இவர் வாழ்வில் மலர்கிறது. புதிய காதல் வாழ்வில் மலர்ந்தால் பழைய காதலின் நினைவுகள் நெஞ்சை விட்டு அகலுமா என்ன ? உண்மையான காதல் கல்லில் பொறித்த சின்னமாக நிலைத்து நிற்கும். கடந்த கால அனுபவங்கள் அவரது தற்போதைய உறவிலும் சிக்கல்களை ஏற்படுத்துகின்றன.
இதனால் இவருக்கு இரண்டாவது காதலிலும்
பிரச்சினைகள் உருவாகின்றன.அந்தப் பிரச்சினைகளை எப்படி எதிர் கொள்கிறார் ? காதலில் தான் செய்த தவறுகளை உணர்ந்தாரா ? இறுதியில் அவரது காதல் என்னவானது ? என்பதே இந்தப் படத்தின் மீதிக் கதை .
திரை நட்சத்திரங்கள் :-
மனோ கதாபாத்திரத்தில் ஏகன் நடித்திருக்கிறார். தன்னுடைய தனித் திறமையை நன்கு வெளிப்படுத்தியிருக்கின்றார்.மாணவிகள் மட்டுமே படிக்கும் மகளிர் கல்லூரி எப்படி திடீரென்று கோ எஜிகேசனாக மாறியது ? அப்படியே மாறினாலும் இவர் மட்டும் தானா மாணவர். இதனை நம்பும்படியாக இல்லை ?
ஒரு ஒரு மாணவனாக சேரும் அவர் அறிமுகக் காட்சியே அமர்க்களம்… கல கலப்புக்கு பஞ்சம் இல்லை. தன்னைச் சுற்றி மாணவிகள் கூட்டம் இருக்க, ஆரம்பத்தில் அந்தச் சூழலை எப்படிச் சமாளிப்பது எனத் தெரியாமல் திண்டாடும் ஏகன் பின்னர் மாணவிகளோடு இணைந்து அரட்டை அடிப்பது ரசிக்கும்படியாக இருக்கின்றன.
கல்லூரி மாணவிகளோடு அரட்டை அடிப்பது , காதல் வலையில் விழுந்ததும் அவர் முகத்தில் தெரியும் உற்சாகம் , காதலியிடம் தனது உணர்வுகளை வெளிப்படுத்தும் விதமும் மிக அருமை
படத்தின் முதல் பாதியில் ஜாலியாக அவர் வலம் வருகிறார். அதே சமயத்தில் பழைய காதலின் நினைவுகளில் இருந்து வெளியேற. முடியாமல் தவிப்பதும் , புதிய உறவில் தடுமாறுவதும் இந்த மாதிரியான காட்சிகளில் உணர்வு பூர்வமாக நடித்து தன்னுடைய தனித் திறனை வெளிப்படுத்தியிருப்பது அருமை ! அவரின் இயல்பான நடிப்பு படத்திற்கு பக்க பலம். திரை உலகில் அவர் வலம் வருவார் எனவே அவரை நாம் பாராட்டலாம்.
இன்னொரு கதாநாயகி பெமினா ஜார்ஜ் நடித்துள்ளார் இவர் ஏற்கனவே மின்னல் முரளி படத்தில் நடித்து புகழ் பெற்றவர்.காதலில் ஏற்படும் எதிர்ப்பார்புகள் , கருத்து வேறுபாடுகள் , பிரிவினால் ஏற்படும் வலிகள் இப்படி பன்முக திறனை பல காட்சிகளில் பார்வையாளர்கள் கவனத்தினை தன் பக்கம் ஈர்த்திருக்கின்றார்.
பெரும்பாலான படங்களில் இரண்டு கதாநாயகிகள் நடிப்பது உண்டு . அதேப் போல இந்தப் படத்திலும் இரண்டு கதாநாயகிகள் உண்டு. இருப்பினும் இந்தப் படத்தில் இரண்டு கதாநாயகிகளும் தமக்கு கொடுக்கப்பட்ட கதாபாத்திரங்களை உணர்ந்து நடித்திருப்பது மிக அருமை.
துணை நட்சத்திரங்கள் :-
வழக்கம் போல துணை நட்சத்திரங்கள் ஒரு படத்திற்கு வலு சேர்ப்பவர்கள் அந்த வரிசையில் அதிர்ச்சி அருண் , சுப்ரமணியன் சேது , ஸ்ரீதேஜ் எஸ்.கே போன்றோர் அடங்குவர். இவர்களுக்கு கொடுக்கப்பட்ட கதாபாத்திரங்களை உணர்ந்து நடித்து படத்திற்கு பலம் சேர்த்திருப்பது படத்திற்கு ஒரு பிளஸ் பாயிண்ட்.பிரிகிடா ஒரு பாடல் காட்சியில் சிறப்புத் தோற்றத்தில் வந்து போகிறார்.
தொழில் நுட்பக் கலைஞர்கள் :-
இசை :- சித்து குமார்.
காதல் திரைப்படங்களுக்கு இசை முக்கிய பங்கு வகிக்கிறது என்று சொன்னால் அது மிகையாகாது. அந்த வரிசையில் சித்து குமார் தனக்கு கொடுக்கப்பட்ட பணியை மிகச் சிறப்பாக செய்து முடித்திருக்கிறார்.
பின்னணி இசை ஒரு படத்திற்கு பலம். அந்த வகையில் கல்லூரி கலாட்டாவிற்கு ஏற்ப துள்ளலான பின்னணி இசையைச் சேர்த்து படத்திற்கு வலு சேர்த்து இருக்கிறார். இரண்டாம் பாதியில் காதலின் பிரிவின் போது ஏற்படும் வலியை உணர்த்தும் விதமாக இசையின் தன்மையை மாற்றி அமைந்திருப்பது மிக அருமை ! புதியவர் வரவு திரையுலகிற்கு மிக மிக தேவை. அந்தோணிதாசன் பாடும் பாடல் ” எப்பா ஏசப்பா ” உற்சாகமான இசையால் பார்வையாளர்கள் கவனத்தை தன் பக்கம் இருந்திருக்கிறார். ” கருவிழி ” என்ற பாடல் மென்மையான இசையால் நம்மை கட்டிப்போட வைத்திருக்கிறார். பாடல் வரிகள் தான் சரியாக புரியவில்லை. பாடுவதில் தெளிவில்லை. அதனை தவிர்த்திருக்கலாம்.
ஒளிப்பதிவாளர் :- பிரியேஷ் குருசாமி . இவரின் கைவண்ணம் இயக்குநரின் எண்ணங்களை திரையில் பிரதிபலிக்கிறது. தன்னுடைய வண்ணக் காமிராவால் அழகு சேர்த்திருக்கிறார். காட்சிகளை அழகு படுத்தியிருக்கிறார். கல்லூரியின் சுற்றுச் சூழல் , காதல் காட்சிகள் இவைகளை தத்ரூபமாக காட்டியிருப்பது பாராட்டுக்குரியது. உணர்வு பூர்வமான காட்சிகளை மிக நேர்த்தியாக ஒளிப்பதிவு செய்து இருப்பது மிக அருமை.
இயக்குநர் :- யுவராஜ் சின்னசாமி :-
ஹரிஹரன் ராமின் கூடுதல் திரைக்கதை அமைப்புடன் இப் படத்தின் இயக்குநர் யுவராஜ் சின்னசாமி எழுதியுள்ள வசனங்கள் பல இடங்களில் , காட்சிகளில் பார்வையாளர்களின் கவனத்தை ஈர்க்கின்றன. காதலர்களுக்கு இடையே ஏற்படும் ஊடலை ரொமான்ஸ் என்ற பெயரில் நியாயப்படுத்தும் போதும் சரி , ஒருவரை ஒருவர் மனத்தளவில் காயப்படுத்தும் போதும் சரி அதற்கு பெயர் தான் காதலா ? எனக் கேட்கத் தோன்றுகிறது.
காதலில் மிகுந்திருப்பது அன்பும் புரிதலும் தான். அதை விடுத்து ஒருவரை ஒருவர் கட்டுப்படுத்துவது காதலுக்கு சாத்தியமாகாது. என்றக் கருத்தை இந்தப் படத்தில் வலியுறுத்துகிறார் இப்படத்தின் இயக்குநர்.
காதலர்களுக்கு இடையே நடக்கும் அடிதடியை காதலின் வெளிப்பாடாகப் பார்க்க முடியாது. அது வன்முறை தான் என்ற கருத்தை சொல்லும் விதம் மிக அருமை .
முதல் பாதியில் காதல், மாணவர்களின் கலாட்டா என ஜாலியாக கதை நகர்கிறது. ஏகன் கல்லூரியில் சந்திக்கும் சூழல்கள் அதனைத் தொடர்ந்து வரும் நகைச்சுவை காட்சிகள் நம்மை இரசிக்க வைக்கின்றன.
இரண்டாம் பாதியில் காதல் பிரிவு அதனால் ஏற்படும் வலி உறவுகளில் ஏற்படும் சிக்கல்கள் என உணர்வு பூர்வமான பாதைக்கு இப் படம் செல்கிறது.
புதிய கதைக்களத்தை தேர்ந்தெடுத்து இளமை ததும்பும் காட்சிகளை அமைத்து அதற்கு சிகரம் வைத்தாற் போல வசனங்களை எழுதி இடையிடையே இனிமையான பாடல்களை அமைத்து அழுத்தமான ஒரு காதல் கதையை சொன்ன இயக்குநரை பாராட்டலாமே !
திரைப்பட கலைஞர்கள் :-
ஏகன் – கதை நாயகன்
ஸ்ரீதேவி அப்பல்லா – கதை நாயகி
முன்னணி நடிகை ஃபெமினா ஜார்ஜ் , அதிர்ச்சி அருண் , சுப்பிரமணிய சேது , அதியமான் , மைம் கோபி மற்றும் பலர்
தொழில் நுட்பக் கலைஞர்கள் :-
இயக்குநர் :- யுவராஜ் சின்னசாமி
திரைக்கதை ( கூடுதல்) ஹரிஹரன் ராம்
இணை தயாரிப்பு :- ஸ்ரீனிவாஸ் நிரஞ்சன்
நிர்வாக தயாரிப்பாளர் :- ஏகன்
தயாரிப்பு :- டாக்டர் டி.அருளானந்து , மேத்வோ அருளானந்து
இசை :- சித்து குமார்
ஒளிப்பதிவு :- பிரியேஷ் குருசாமி
படத்தொகுப்பு :- சக்தி பிரனேஷ் பி
கலை :- பிரேம் கருந்த மலை
நடனம் :- அனுஷா விஸ்வநாதன்
” ஹைக்கூ ” என்னும் திரைப்படத்தின் திரை விமர்சனம் :-
இந்தத் திரைப்படத்தின் திரை விமர்சனம் செய்த போது ஒரு நல்ல தரமான கதை நமக்கு புலனாகிறது. அனைவரும் பார்க்க வேண்டிய ஒரு நல்ல படம். இதில் நடித்தவர்கள் மற்றும் தொழில் நுட்பக் கலைஞர்கள் எல்லோரும் உணர்ந்து செயல்பட்டிருப்பது பாராட்டுக்குரியது . மேலும் மேலும் நல்ல நல்ல படங்களை எடுங்கள் . வாழ்த்துகளை பெறுங்கள் . எங்களின் பத்திரிகை குழு நடுநிலையாக நின்று நல்லதொரு தீர்ப்பினை வழங்கி வாழ்த்துகிறது. மீண்டும் சந்திக்கும் வரை உங்களிடமிருந்து விடை பெறுபவர் உங்கள் கவிஞர் வேளச்சேரி அ.சந்திரசேகர் எம்.ஏ ; பி.எட் ;
